الافكار والمشاريع التجاريةقسم يقدم افكار مشاريع ناجحة ومشاريع صغيرة مربحة للباحثين عنها بالاضافة مساعدة اصحاب مشاريع تجارية بتنمية ارباحهم وتسهيل عملهم
مرحبابك ياخوية في مترودبي وان شاء الله انشوفك من كبار رجال الاعمال في الدولة .. توكل على الله واتقن عملك والله بيوفقك ان شاء الله
بخصوص سؤالك عندي اكثر من اقتراح وان شاء الله تستفيد منم وتدعيلي ^^
1- تعرف السوق الصيني في دبي ..؟ الاحظ كل ماسيرله واشتري اجهزة كبيرة يقولي راعي المحل يانج تشلين اغراضج او تدفعين 100 درهم زيادة للسيارة .... فكرتي هية تشتري سيارتين بكب وحدة عودة والثانية متوسطة ونقسم 100 الف الي عندك ... تدفع 20 الف دفعه اولى لكل سيارة يعني بتدفع 40 الف كدفعه اولى لسيارتين والباقي اقساط كل سيارة 2500 كل شهر يعني بتدفع 5000 كل شهر .... ومش لازم يكون موديل السيارتين يداد في البداية مشي حالك ..... انزين بنفرض انك اشتريت السيارتين وتعاقدت ويا اكثر من محل بانه اي مشوار ب 100 درهم ووايد محلات يدورون هاي الخدمة ... بنفرض تعاقدت وياعشرين او خمسين محل وكان ربحك اليومي لكل سيارة 300 درهم يعني 600 درهم لسيارتين في الشهر بيكون ربحك 18 الف طبيعي بتدفع رواتب الدريولية الي عندك بنقول الاثنينه 5000 او 6000 وبتدفع اقساط البنك لسيارتين 5000 يعني صافي ربحك في الشهر من 8 اللا 10 الاف ^^ وللعلم انا قلتلك ربحك اليومي 600 عن السيارتين تخيل لو 1000 درهم ( الله يوفقك يارب ) .. اتمنى تكون استوعبت الفكره
2- بخصوص فكرتك تربيه المواشي الصراحة أأيدك وبقوه ^^ لاتنسى انه عندك 60 الف باقي راس مالك 100 الف لانك دفعت 40 الف دفعه اولى للبنك عن السيارتين .... على فكرة تروم تشتري السيايير وتيبلك دريول تقوله انا مابدخل في ربحك اليومي بس عطني فايدة ثابته كل شهر يعني هوه الي بيتكفل عن قرض البنك والبترول وصيانه السيارة انته الي عليك تستلم فايدتك اخر الشهر بدون صدعه راس لا تتعاقد معا محلات ولا تدخل في شي
بس لو بتربي مواشي يبالك مكان نظيف عزبة او زاوية في مزرعه بتستغلها في تربيه المواشي ( الهوش ) يبالك طبيب بيطري وعلف وامور ثانية اذا حاب نتناقش في هدا الموضوع فالك طيب عندي افكار حلوة لاني كنت بفتح هالشي بس قلت يباله مجابل..
خوية دام انك مصر وتبا تربي هوش ( مواشي ) والله انها فكره ممتازة ورزقها حلو
بقولك الي عرفته لانه من فتره طويله كنت افكر في هالشي وعقبها اتجهت للعقار
الاشياء الرئسية هي :-
المكان _ اجود ( احسن ) انواع المواشي ( عدنا العربية افضل من الجزيري والهندي والصومالي وغيرة ) العلف ( طعام المواشي ) _طبيب بيطري _ بيادير ( هنود او اي جنسية ترتاح لها لمجابل المواشي ( الهوش ) و تنظيف المكان واطعامم ) _ الختم ( بتستغرب من كلمة الختم ^^ ) برايه الشخصي:- اشوف الختم شي مهم في تربيه الهوش لانك ماتضمن البيدار امين او لا يوم بتختم هوشك بتعرف اشياء وايدة من العدد والجنس واذا كان البيدار يبيعم في السوق وانته ماتدري اولا
بخصوص المكان :- _ طبيعي انك بتخليلم مكان واسع ومكان خاص للنوم ومكان للليلسة والاكل ^^ يعني المكان بتقسمة قسمين مكان للاكل ومكان للرقاد واهم شي التهوية ظروري تركز على التهوية ونظافة المكان .
_ اذكر من زمان واحد نصحني قالي في ارضية الزرب ^^ ماعرف شو تسمونة حنا نقول زرب الهوش قالي لالالازم في الارضية تحطين شبك يعني اممممممم شبك في الارضية وبعدين تدفنه برمل عسب مايضايقون وسبب الشبك في الارضية لانك بتمنع الفيران والحشرات الثانية من الحفر والدخول على الهوش ( ان دخل الفار استوت حاله استنفار في الزرب هههههه ) واشوف الشبك زين لانه الفيران والحشرات يمَرضون الهوش وانته متعبل منم وتطعم وتستغرب من سبب المرض او من وين دخل عليهم الفار او اي حيوان ثاني
_ الهوش محتاجين مكان يرعون فيه.. غير عن الطعام ( العلف ) الي توفره لهم بس يبون بين وبين توديهم مكان يرعون فيه وهالشي ظروري لا تتهايز عنم ^^
_ لو طرى شي في بالي بخصوص المكان برد اكتبه
بخصوص العلف :-
- اكل الهوش معروف سبوس وشعير وشوية ماي __ شي ناس تحط تمر _ وتبا الصدق اكل البيت ماشي اخير عنه يعني باقي الغدا والخضروات ( لو تتعامل معا محل للخضرة تقوله كل يومين بخلي الدريول يخطف عليك وياخذ كراتين الخس والجرجير وغيره من الباقي الي اقصدة الي محد بيشترية بيعطيك بسعر زين احسن مايعقه في الزباله _ بس انته بعد لازم تمر على مزارع وتنشدم شو الافضل لانك لو مسوي سمج طبيعي مابتحط للهوش سمج الافضل انك تنشد اكثر عن العلف وشو الي يسمن والصخله ^^
_ طبيب بيطري :_ تتعاقد معا دكتور بيطري يكون الدكتور مرخص وعنده عيادة مش اي هندي يحوط على المزارع تتعاقد معاه لانه الخبره شي مهم المهم الدكتور كل اسبوعين يخطف على مزرعتك ويعاين الهوش ويخبرك هاي شو بلاها ومنو الحشار وكل هاي الامور لو يسويلك تقرير كل اسبوعين افضل
_ غير عن لحم البلاد ماشي طري وابيض وطعمه لذيذ والافضل انك تربي الشي الزين لاني لاحظت شي من اللحم اليزيري او اي نوع ثاني يانه لحمة عصص او فيه ريحة شوي ^^ والاختيار لك
_ هلك وربعك ومعارفك لو جربوا الذبايح من مزرعتك وعيبم اللحم الطري طبيعي بيحجزون وبيطلبون من مزرعتك وبيسوولك دعاية .
_ان شاء الله يوم الله بيباركلك في المزرعه وبيكون انتاجك كبير وعندك ختم معين تروم تسوي رخصة وتوزع اللحم على محلات اللحوم او كارفور وغيره ( يعني يكون الختم الي عندك شرات الماركة اللحم هذا طيب ولحم البلاد وسعره مناسب وتوزعه على محلات اللحوم وغيره )
_تتفق معا المطاعم الكبيرة تقولم بعطيكم سعر مناسب وطبيعي المطاعم محتاجين ذبايح طيبة ^^ وتكتب في البروشور او لسته الطلبات المطعم انه اللحم تسمية اسم وتحط شكل الختم ( ان شاء الله تكون فهمتني ^^)
_ اعلانات في الجرايد والنت والمجلات وغيره ( مابتسوي كل هذا الا يوم تحس انه عندك عدد كبير تروم تغطي كل الطلبات )
_ خل بيدار من البيادير يشل كم راس ويسيربم السوق ويسوقك هناك ويبيعم ^^
_ لي عوده ان شاء الله بهالخصوص
بخصوص من وين تيب لحم البلاد
_ مكووود ياخوية ^^
سر الذيد وخذلك كم راس وشوي شوي بيتكاثرون
يعني اخطف على واحد من ربعك يخبرك اشياء وايدة عن الهوش ويعلمك كيف تعرف انها صومالية او يزيرية او عربية اصلا من الشكل بتعرف
اذكر واحد قالي يسير عمان وايب كمية كبيرة على اساس اسعارم ارخص عنا بس عااادي في الدرب كم وحدة تموت لانم يصاقعون طول الدرب ^^ ههههه
ياخوية انته من تدخل هالمجال بتتعرف على التجار وبتعرف امور كثيرة ماكنت تعرفها
وان شاء الله يارب الله يوفقك ويسر امرك ونشوفك من اكبر رجال الاعمال
الذبايح اللي من عمان اظن انهم وقفوها اذا ما خاب ظني
يعني الذيد فيها ثــــــــــــــآنكس اختي العوووووده
انا ببدأ بها المشرووووع الله يوفقني ويوفق الجميييع
واذا عندج بعد افكار اتمنى انج ترسلينها ع الخاص
العرض العادي
